Dulu, namanya Kampung Buni, Kelurahan Buni Bakti, Kecamatan Babelan. Tapi pas ditemuin situs peninggalan sejarah masa lalu, di mana banyak ditemuin emas di sono, Kampung Buni tempat adanya situs tersebut berubah nama jadi Kampung Buni Pasar Emas, begitu juga nama jalannya nyeng berobah jadi Jalan Raya Pasar Emas. Nama tempat perahu penyeberangan nyeng nyambungin kampung Buni ama kampung Muara Bakti juga disebut Érétan Buni Pasar Emas, sementara penyeberangan nyeng atu lagi, ngalor dikit, disebut Érétan Buni Baru nyeng ada di kampung Buni Baru, nyeng nyambungin kampung Buni Baru ama kampung Baru nyeng dulu disebut kampung Sungé Kléci. Kedua érétan ini ngeliwatin kali CBL, peca’an kali Bekasi nyeng langsung nembus ke laut.
Kira-kira 500 meter dari érétan Pasar Emas itu, ke belah kulon, di situlah awal semua nama ama itu sebutan. Situs Buni merupaken kawasan penemuan benda-benda arkeologi, semacem tembikar dari bermacam bentuk ama ukuran, semacem periuk, mangkok bekaki, kendi ama tempayan. Ada juga beliung persegi, artefak (benda-benda, semacem alat, perhiasan nyeng ngunjukin kemonésan kerja manusia (terutama zaman dulu) nyeng ditemuin liwat penggalian arkeologi) logam perunggu ama besi, gelang dari batu, perhiasan emas, manik-manik, bandul jala dari terakota (tanah liat nyeng dibakar sampe warnanya jadi merah kecoklatan), kerang, cincin macem-macem ukuran, kampak persegi dari batu, periuk berhias, dan bahkan tulang ama tengkorak manusia. Dinyana-nyana, masyarakat Buni udah mengenal tradisi penguburan langsung tanpa wadah dongan tembikar manting bekel kuburnya. Tapi kagak nutup kemungkinan kalu itu tembikar-tembikar dijadiin juga buat keperluan sunggal-sari.
 |
Peta Lokasi Kampung Buni Pasar Emas (Buni Bakti)
|
Dari macem-macem itu temuan, romananya tembikar jadi nyeng paling nonjol. Tembikar di komplek Buni dibagi jadi dua, yakni tembikar neolit ama perundagian. Tembikar neolit ditandain ama tatap be’ukir dongan pola hias anyaman keranjang ama duri ikan. Pada masa perundagian, tembikar Buni mingkin ngembang semacem periuk, kendi, cawan miarni, cawan bekaki, tutup ama bandul jala.
Ali Anwar, tokoh sejarawan dari Bekasi, pernah nulis dalem blog pribadinya mengenai Situs Buni Pasar Emas ini. “Sebagai sejarawan, saya amat tertarik. “Gimana ceritanya sampe ada harta karun emas ? Menurut Mamang Dogol, petani warga asli nyeng tinggal di pinggir Jalan Pasar Emas. Meski usianya 70 tahun, namun petani yang kulitnya menghitam bekas terpangang matahari, itu masih memiliki otot yang kuat. Tatapan matanya tajam, dan daya ingat yang masih kuat. Kisahnya bermula pada 1958. Ketika itu Dogol muda membuat kalenan atau kali kecil agar air dari Kali Bekasi bisa dialiri ke sawahnya. Tiba-tiba matanya melihat sebuah “kute” (anting) kecil yang ngonggok di bibir lubang binatang yuyu. “Ternyata itu kute emas 0,5 gram,” kata Mang Dogol.
Temuan Mamang Dogol menghebohkan penduduk. Berharap ada kute-kute lain, mereka berbondong-bondong mencangkul tanah sekitar lokasi. “Astaghfirullah, pada kedalaman satu setengah meter, ditemukan ratusan kerangka manusia,” Mamang Dogol mengenang.
Berbeda dengan kerangka umat Muslim yang menghadap kiblat (barat), kerangka yang mereka temukan umumnya menghadap utara. Menunjukkan mereka menganut kepercayaan para leluhur. Pada setiap kerangka yang telah rapuh tersebut, selalu ada perhiasan emas dengan aneka bentuk yang menempel di leher, tangan, dan kaki. Pada bagian bawah kerangka, ada semacam besi panjang. Di sekelilingnya terdapat berbagai gerabah berisi emas, beliung persegi, sampai batu warna-warni.
Heboh. Ribuan orang dari Bekasi, Jakarta, Karawang, Bandung, hingga Jawa tengah dan Jawa Timur mengaduk-aduk tanah Buni. Emas yang ditemukan langsung dilego kepada para penadah dadakan yang membuat tenda darurat. Adapun berbagai gerabah bersejarah hancur lebur, beliung persegi dilempar kemana mereka suka.
Belakangan arkeolog menyatakan, semua itu merupakan peninggalan nenek-moyang orang Bekasi sekitar 2000 tahun silam. Mereka menamakannya sebagai Situs Buni. Yang tersisa kini masih banyak tersimpan di Museum Nasional, Jalan Merdeka Barat, Jakarta. “Sejak saat itulah jalan kampung ini dinamain Jalan Pasar Emas,” kata Mamang Dogol”.
Lokasi: Kampung Buni Pasar Emas, Desa Buni Bakti, Kecamatan Babelan, Koordinat : 6 5' 21" S, 107 1' 20" E.
Temuan di lokasi Situs Buni Pasar Emas
Jem dua siang. Ana meluncur dari arah Marunda. Langit udah mulain gelap sabab teduh pas ana sampé di pertigaan pasar Bojong, Tarumajaya, Bekasi. Dadakan, ni ati péngén bangat biluk ngéré, pedahal, ana kudunya lempeng ngidulin nerus kalu mao arah pulang. Ninggangnya, ana biluk ngéré dan nerus jalan ngétanin. Ana jalan antér-antér sebaru mikir-mikir mao jalan ke mana yagénan gerimis mulain turun atu-atu. Dadakan juga, ana inget, udah lama kagak maén ke Kampung Buni, jadi ana pikir, kagak ada salahnya kalu ana natab ngelongok lagi ke sono.
Masup Desa Segara Jaya, Langit cera lagi. Jadi girang, soalnya kagak bakal ada masalah kalu enti ana amplang-impleng di lokasi Situs Buni Pasar Emas. Kagak lama, ana sampe di jembatan Kampung Buni Pasar Emas. Ana melongo, lantaran banyak mobil bejejer di jalan, persis di depan lokasi situs. Ana sempet ngira, jangan-jangan ini rombongan bésan nyeng mao kondangan ke tempat keriyaan di deket-deket situ. Ana sempet ngeluh karena mikir kalu ana roman-romannya bakalan urung mampir ke lokasi situs karena ana pikir ada orang setempat nyeng lagi ramé-ramé. Ana jalan terus entak-anu masup ke dalem parkiran nyeng ada di latar mushola di situ. Amplang-impleng, généngan, kagak ada orang keriyaan. Entak-anu, sapa ama pada mao ngapain ni rombongan ? Mikir begitu, ana tegesin itu kendaraan rombongan. Kebanyakan kendaraan pribadi, tapi ada atu kendaraan pemerentah desa setempat nyeng be’tulisan : Desa Samudra Jaya. Nah nih ? Ditambah lagi, turun atu orang (betawi bekasi asli) nyeng ana kenal sebage camat di satu wilayah di Bekasi. Jadi tambah penasaran ana. Ada apaan nih kira-kira ya ? Paling kagak, musti ada nyeng penting atawa ada orang penting nih...
Anteng, ana ngemped di samping mushola, sebaru negesin orang-orang nyeng turun dari kendaraan-kendaraan itu. Atu, dua, tiga.. kagak ada nyeng kenal juga. Tapi madak-madak, ana kaget pas ngeliét sapa orang terakhir nyeng turun dari kendaraan. Baba Aji (mahap kalu ana manggil begitu) Ridwan Saidi, tokoh politisi ama budayawan betawi. Kejawab udah rasa penasaran ana. Kelempengan bener, kagak disangka-sangka bisa ngeliét beliau di sini. Alhamdulillah... kaki kanan nih ana...
Entak-anu, ana masup ke dalem rumah pemegang benda-benda bersejarah. Namanya Ahmad Safi’udin, atawa tetangga-tetangganya nyebut, Saki’udin. Be’umur kira-kira 60 taunan (paling kagak, begitu nyeng dia akuin). Dia diajak kongkoh ama ditanya macem-macem ama semua orang (lantaran nyeng ana tau, banyak juga rombongan wartawan dari macem-macem media nyeng ngikut dateng buat ngeliput itu situs), kemasuk ama Baba Aji Ridwan Saidi (mahap juga kalu ana ngikut ngambil itu benda-benda peninggalan sejarah dongan kemasuk beliau di dalemnya). Mamang udin nyoba ngejawab semua pertanyaan berdasar apa nyeng dia tau ama nyeng dia ranapin déwék, dari mulain awal dia nemuin benda-benda itu, potongan-potongan kerangka manusia, rangkaian batu bebentuk kalung, tembikar-tembikar, emas sampe cerita-cerita mistis.
“Waktu nemuin ni batu (katanya sebaru ngambil potongan lémpéng batu putih bening dari atas nampan plastik), malemnya saya didatengin ama macan putih. Kalu batu nyeng item ini (katanya lagi sebaru ngambil potongan batu item nyeng ukuran ama bentuknya ampir sama ama batu nyeng pertama), malemnya saya didatengin uler item gede di depan rumah saya, tapi itu uler kagak galak, mala’an keliétan kayak nyeng mao ngajak ngomong. Kalu ni tumbak (dia menunjuk ke arah batang bambu seukuran diameter 20-30 mm sepanjang kira-kira satu meter, dengan mata dari batu gepéng ama bongkot nyeng juga dibuat dari batu), saya didatengin ama orang tinggi item nyeng tingginya ampe mentog internit (plafond) rumah saya”.
Abis tanya-jawab, Mamang Udin ngajak rombongan tetamu muter-muter ke rumah ke kebon ama rumah lamanya, nyeng kalu kata dia, tempat dia nemuin semua benda-benda itu. Emang bener, di satu bagian kebonnya, dia sempet ngunjukin lobang galian nyeng dia buat di tanah, di mana banyak pecahan-pecahan tembikar nyeng nyampur jadi satu ama tanah, boleh dikata, ampar-amparan. Lantaran di mana tanah dia keduk, di situ pasti nyelip potongan-potongan tembikar nyeng emang udah pada pecah.
Ngeliét dari keadaan, lokasi situs boleh dikata kagak keurus pisan. Kagak ada bekas-bekas upaya pelestarian dari pihak nyeng (kudunya) bersangkutan ngurusin pekara peninggalan sejarah. Yagén pagimana juga, apa nyeng udah dikerjain sama Mamang Udin selama ini, pantes dihargain, apa baé alesannya. Tapi kagak tau ngapa, masalah peninggalan sejarah pasti aja jadi semacem “nebang bambu dirorod dari ujung”. Ini bukan cerita baru, tapi udah mangap dari sekiter taun 60-an. Apa kudu maké cara “ngobong semut supaya kuar dari lobang” buat minta perhatian dari pemeréntah ? Tapi apa mungkin ? Soalnya, empan udah dipasang di ruit, ngapa belon ada ikan nyeng nenggak ? Ngenes emang. Sempet juga ana denger jawaban dari Mamang Udin waktu ditanya : “bapak dulu sering nemu emas, kan ? lantas, ke mana emas-emas itu ?”. Mamang udin cumen nyengir sebaru njawab tatak-tutuk : “eheh.. anu.. begitu dah.. kerna kebutuhan...”. Entak-anu, sapa nyeng kudu disalahin ?
Nambah sore, rombongan mulain pegih ngétanin. Ana sempet nanya ama salah satu anggota rombongan, katanya, mao nerus ke kampung Blendung, Desa Kedung Pengawas, Kecamatan Babelan. Ah, sayang bangat. Pas ana kuar dari lokasi, mobil nyeng mbawa Baba Aji Ridwan Saidi udah pegih. Nyesel juga kagak sempet ngajak kenalan ama beliau...
Mudah-mudahan aja ke depannya, dongan kunjungan beliau ke lokasi Situs Buni Pasar Emas, ini bakal bawa perkembangan nyeng baék, buat Situs Buni Pasar Emas khususnya, ama buat semua situs bersejarah di betawi nyeng laén lagi umumnya, baék itu nyeng udah diungkap atawa nyeng belon kelar. Baék nyeng mandeg pengerjaannya atawa nyeng belon dicemék-cemék acan ampé waya gini...
Sebaru nunggu orang-orang betawi laén nyeng mao peduli ama peninggalan sejarahnya bangun...
 |
H. Ridwan Saidi di Lokasi Situs Buni Pasar Emas
|
BETAWI BEKASI BERSATU
Tidak ada komentar:
Posting Komentar